“ሀገሬ አትናፍቀኝም” 

የቀድሞው  እውቅ ዘፋኝ የአሁኑ ዘማሪ ሙሉቀን መለሰ ሰሞኑን በሰጠው ቃለ-ምልልስ ኢትዮጵያ አትናፍቀኝም በማለቱ  መስመሩን ለቀቅ ያደረገ  ዘለፋና ትችት እያስተናገደ ነው። ሙሉቀን “ሀገርህ ትናፍቅሃለች ወይ?” የሚል ጥያቄ ሲቀርብለት ሰንደቅ ዓላማ ጠምጥሞ “እምዬ ሀገሬ”እያለ ማልቀስ የሚያቅተው አይመስለኝም። ያን ቢያደርግ ቢያንስ አሁን እየደረሰበት ያለው ዘለፋ ላይደርስበት እንደሚችልም አይጠፋውም። ሆኖም የሽንገላ ቃል ከማዥጎድጎድ ይልቅ እውነተኛ ስሜቱን ሳይዋሽ መናገርን መረጠ። በበኩሌ  ስሜቱን ሳያድበሰብስ  በግልጽ በመናገሩ አድንቄዋለሁ።

ሌላው “አትናፍቀኝም” ሲል ብዙ ምክንያት ሊኖረው እንደሚችል መገመትም ይቻላል።  በቀላሉ ሀገሬ -ንጹሀን- በግፈኛ ባለጊዜዎች የሚገደሉባት፣ህግ የሌለባት፣ ድሆች የሚያለቅሱባት፣ ወጣቶች ሥራ በማጣት በአጉል ሡሶች የጠፉባት…ምድር  እስከሆነች ድረስ ልትናፍቀኝ አትችልም እያለ ሊሆን ይችላል። ዞሮ ዞሮ ምክንያቱም ምንም ሆነ ምን  ሀገሬ አትናፍቀኝም በማለቱ ልንዘልፈው የምንችልበት ምንም ዐይነት የሞራል መሰረት የለንም።

እኛ እንናፍቃታለን ለምንላት ሀገራችን ግዴታችንን የምንወጣውና ፍቅራችንን የምናሳዬው በተግባርና በሥራ እንጂ ከኛ የተለዬ ሃሳብ የሰጡትን በመዝለፍ አይደለም።  አንድ የሀገር ባለውለታ  እኛ የማንወደውን አስተያዬት በመስጠቱ  ውለታው ሁሉ በዜሮ ተባዝቶ  በጤንነት መታወክ ሳቢያ ባጋጠመው ችግር ላይ መሳለቅ እጅግ ያሳዝናል፣ ያሳፍራልም።

ወንድማችን ሙሉቀን መለሰ፣ እግዚአብሔር ምህረቱን ያወርድልህ ዘንድ ጸሎታችን ነው።