የሳሙኤል ገዳዮች ሳሙኤል እንዲገደል ትእዛዝ ሰጥቶ ገዳዮቹን የላከው (በፎቶው ላይ የቆመው) አቶ ነጋ እና ከተያዘው ገዳይ ጋር አብሮ በዱላ ደብድቦ የገደለው አቶ ጌታነህ (የተቀመጠው) ከብዙ ውጣ ውረድ በኋላ መጋቢት 3/2012 ተይዘዋል። ገዳዮቹ ማንነታቸው ከታወቀ አንድ አመት አካባቢ ሆኗቸዋል ይሁንና ከነበሩበት የስራ ሀላፊነትና ከወንጀሉ ረቂቅነትና አሰቃቂነት አንፃር ግለሰቦቹን በቁጥጥር ስር ለማዋል ብዙ ልፋትና ጊዜን ወስዷል።ሰማእቱ ሳሙኤል መሞቱን እያወቀ “ከሞትኩም ትግሌን አደራ” እያለ እየፃፈ ነው የተገደለው። ከገዳዮቹ መካከል አንዱ ወዲያው ቢያዝም ዛሬ በቁጥጥር ስር የዋሉት ግብረ አበሮቹ ያኔ የዞኑ ደህንነት ፅ/ቤት የሀላፊነት ቦታ ላይ ነበሩና በህዝብ ርብርብ የተያዘውን ገዳይ “ነገሩን ካልገለፅክ እናስፈታሀለን” በማለት ግድያውን  የፈፀመው በግል ፀብና በሳሙኤል ጥፋት እንደሆነ እንዲናገር አድርገው ከግድያው በላይ ለሰማእቱ ክፉ ስም በመስጠት ነገሩን አለፉ።

የንፁህ ሰው ደም ፈሶ አይቀርምና ነገሩ ከተፈፀመ ከ5 አመት በኋላ እውነት መቃብር ፈንቅላ ወጥታ ሊያዙ ችለዋል። በዚህ ሂደት ውስጥ ሳሙኤል እንዳይረሳ ሌት ተቀን ባለስልጣናቱን ስትወተውትና ገዳዮቹ እስከሚያዙ ድረስ ሌት ተቀን የህግ ሰዎች እንቅልፍ አጥተው እውነቱን እንዲያወጡ የሰራችው ዝናሽ ጫኔ የተባለች የሳሙኤል ቤተሰብ የአንበሳውን ድርሻ ትወስዳለች።

“ከብአዴን መረጃ አገኘን” የሚሉ ሰዎች የሳሙኤል ገዳይ ነው ብለው ስም ለጥፈው በየሚዲያው ያብጠለጠሉት ደረጄ አላምረው ፍረጃውን ሁሉ ተቋቁሞ እውነቱን ለማውጣት ከባልደረቦቹ ጋር ያደረገው ጉዞ ፈታኝ  ነበር በግድያው ወቅት በቁጥጥር ስር የዋለው ገዳይ እውነቱን እንዲያወጣ ከማሳመን ጀምሮ በስተመጨረሻም ኦፕሬሽኑን መርቶ ተሳክቶለታል።

“የትኛውም አካል ይሁን አሳደን እንይዘዋለን”ብሎ ቃል የገባው ኮሚሽነር አበረ  አዳሙ እውነቱን ለማውጣት የተጓዘው መንገድም ቀላል አልነበረም ተሳክቶለትም አረመኔዎቹን በእጁ አስገብቷል። (በእርግጥም ግለሰቦቹ እስከሚያዙበት ቀን ድረስ የደህንነት አባላት ነበሩ)

የግድያው መሪ አቶ ነጋ በቁጥጥር ስር በዋለበት ወቅት ተናገረው የተባለውን ነገር ስሰማ ምድር ዞሮብኛል።”ሀገር ለማዳን ብዬ በሰራሁት ስራ ዛሬ መጠየቅ አለብኝ?” አለ አሉ። “ሀገር ለማዳን” ብለው ወጣቶችን እንደ ቅጠል ያረገፉ አረመኔዎች ዛሬም ሳይፀፀቱ የቀደመ ግብራቸውን እንደ በጎ ስራ ቆጥረው ይንጎማለላሉ።

ወንጀለኞቹ እንዲያዙ የጣሩትን አካላት ከማመስገን ባሻገር አሁን ፍትህ ወዳዱ ህዝብ አጀንዳውን መረከብ አለበት ነገሩን በየሚዲያው መነጋገሪያ እንዲሆን ከማድረግ ጀምሮ ጉዳዩ በግልፅ ችሎት እንዲታይ ማድረግ በየችሎቱ እየተገኙም የሰማእቱ ደም ፈሶ እንዳልቀረ ማሳየት ይጠበቅበታል የሳሚን የየእለት የግል ማስታወሻ (ዲያሪ) እንደማንበቤ ከእነዚህ ነፍሰ ገዳዮች ምርመራ በኋላ ሌላ የማይጠበቅ ነገር ሊጎለጎል እንደሚችል ይሰማኛል። ለሁሉም እስከ ፍርዱ ፍፃሜ ነቅተን እንከታተል ባይ ነኝ!!!

******