መቼም ከጥንት ጀምሮ በሃገራችን በሁሉም ሙያ ውስጥየሚገኙ ታላላቅ ባለሙያዎች በአብዛኛው ለታላቅነታቸው ያበቃቸውን ስራ የሰሩት በተመቻቸ ህይወት ውስጥ ሆነው  ሳይሆን የሰው ልጅ እኩይ ተግባር ያሳረፈባቸውን በርካታ መከራዎች ድል እየነሱ ነው::አንደንዶች ለእውነት :ለሰው ልጅ ህይወትና እድገት:ሰላምናፍቅር….ሲሉ ህይወትን የሚያህል ውድ ዋጋ ከፍለዋል::ሌሎች ለስደት ተዳርገዋል::ሌሎች ደግሞ የአካልና የስነ ልቡና ጉዳት ሰለባ ሆነዋል::ዛሬ በክብር ላነሳው የምፈልገው የኪነጥበብ ባለሙያ የጥበብ ስራዎች የሰራው ሐገሪቱ በሰጠችው ምቹ ሁኔታ ሳይሆን ለሐገሪቱ ባበረከተው መልካም ፍሬ ነው::

 ሰሞኑን ረጅም አመት በሃላ ብሔራዊ ቲአትር ላይ የአደዋን በዓል በማስመልከት በተሰራ ቲአትር ላይ ከነ ሚካኤል እና መአዛ ታከለ ጋር መድረክ ላይ ተመለከትኩት:: ደስ አለኝ:: ይህችንም ሃሳብ ለመጫር ምክንያትም ሆነኝ:: ይህ ሰው ሐገሩን የሚወድ ነው:: ለእውነት :ለፍቅር :ለፍትህና ለሰላም የላቀ ቦታ አለው::ልበስሱ ነው::ህይወቱን ሙሉ ለሚወደውና ለሚያከብረው ሙያ እየሰጠ ያለ ሰው ነው::

ሰለሞን አለሙ ይባላል:: ደራሲ : አዘጋጅና ተዋናይ ነው:: ብዙዎች በተለምዶ “አብዬ ዘርጋው ” እያሉ በሚጠሩት “ሸምጋይ” በተሰኝው ተከታታይ የሬዲዮ ድራማው ያውቁታል::የራሱ የአፃፃፍ ይትበሃል ( style)ያለው ፀሃፊ ነው::  በሰው ልጅ ማህበራዊ ህይወት ላይ አተኩሮ የሚፅፍ ታላቅና ጠንካራ ፀሐፊ ነው:: ሰለሞን ለ Virtue Ethics ለሰናይ ምግባርና ለስነምግባር የቆመ ነው::

ለራሱ ሃሳብና እምነት የታመነ ብእረኛ ነው:: የእኩይ ድርጊቶች ጠላት ነው::እውነት ብቻናት የብዕሩ ማዕከል:: ህይወቱ እውነት ናት:: ብእሩም ከህይወቱ የሚቀዱ ናቸው::

ሰለሞን በስራዎቹ ማህበራዊ ሃያሲ ደራሲ ነው ማለት እችላለሁ::በርካታ በህዝብ ክብርና ፍቅርን ያጎናጸፉ የጥበብ ስራዎች  አሉት:: ዛሬም በርካታ የቴሌቪዥንና የመድረክ ስራዎች አሉት::በሐምሌ 1983 ዓም በቤተሰብ መምሪያ የተገናኙት ሰለሞን እለሙ :ሰራዊት ፍቅሬ: አዜብ ወርቁ: ድርብወርቅ ሰይፋ:ፍሬህይወት መለሰ ሆነው በጋራ በከፈቱት “አፍለኛው”በተሰኘው የቲአትር ቡድን ውስጥ ሰለሞን በጻፉቸው በርካታ ድርሰቶች አማካኝነት ብዙ ሰርተዋል::

ሰለሞን አለሙ 500 የሬዲዮ ድራማዎችን ፅፎአል::እንደዛሬው ተከታታይ የቴሌቭዥን ድራማዎች በሌሉበት ዘመን 13 ተከታታይ የቴሌቭዥን ድራማዎችን ፅፎ አዘጋጅቷል::እንዲሁም 6 ቲእትሮችን ጽፏ አዘጋጅቷል ተውኗል ::በሌሎች ፀሃፊያን በተሰሩ የቴሌቪዥ ድራማዎችና ቲአትሮች ላይም ተውኗል:: ሰለሞን በርካታ መነባንቦችንም ለመድረክ አብቅቷል::በተለይ በእሁድ ረፋድ ላይ በኢትዬጵያ ሬዲዮ ለ70 ሳምንት ሲተላለፍ የቆየውና በመላው ኢትዮጵያን ዘንድ ተውዳጅ የነበረው ” ሽምጋይ” ወይም (አብዬ ዘርጋው) የተሰኘው የሬዲዬ ድራማው ዛሬ ድረስ በብዙ ኢትዬጵያዊያን የሚታወስ ድራማ ነው:: ሰራዊት ፍቅሬ: አዜብ ወርቁ: ድርብወርቅ ሰይፋ:ፍሬህይወት መለሰ የዚህ ድራማ ፈርጥ ጌጦች ነበሩ:: ሰለሞን ትላንትም ዛሬም ይፅፋል:: በርካታ የሬዲዮና የቴሌቪዥን እስክሪፕቶችና መነባንቦች አሉት:

  በመጨርሻም

    በሃገራችን በየጊዜው ለሚመጡ ለተለያዪ የፖለቲካ ስርዓቶች እንደጊዜው ሆነው ሙያቸውን ችሎታቸውን እውቀታቸውን የገበሩ እንዳሉ ሁሉ በአንፃሩ በርካታ ፀሃፊያን  ግን ባብዛኛው ከፖለቲከኞች ጋር መስራት የማይፈልጉ ብቻ ሳይሆን አምርረው ይቃወሟቸዋል:: ሰለሞን ዓለሙም ወደ ስርዓቱ መጠጋት ለእሱ የተሻለ ህይወት ሊያስገኝለት እንደሚችል ይህን መረዳት አልተሳነውም::ይህ ሰው ከፖለቲከኞች ጋር መጠጋት እንደ ሃገር ክህደት ስለሚያየው ይጠየፈዋል::ምክንያቱም ከስርዓቱ ጋር መስራት የሐግርንና የህዝብን መከራ በይበልጥ የሚያገዝፍ መሆኑን ስለሚረዳ ብቻ ሳይሆን ለስርዓቱ ክንድ መፈርጠም ተጨማሪ ሃይል መሆን ስለማይፈቅድ ነው:: በዚህ ሳቢያ ብዙ ተገፍቷል::ዛሬ ግን ስራዎቹን ወደአደባባይ ለማውጣት እየሰራ ነው:: ብዙዎችም ከእሱ ጋር ለመስራት በሩን እያንኳኩ ነው:: ብዙ ጊዜውን በስቱዲዮው ውስጥ በስራ ነው የምያሳልፈው::  ሶል ዛሬም ከበርካታ ወጣት ጸሐፍትና ተዋንያን ጋር ሆነህ ብዙ ስራዎች እንደምታሳየን እርግጠኛ ነኝ:: እግዚአብሔር ረጅም እድሜ ከጤና ጋር እንዲሰጥህ እመኝልሃለው::!!