በኢትዮጵያ የተለያዩ አካባቢዎች የሚካሄደው እስርና አፈና ተጠናክሮ ቀጥሏል (ኢትዪ 360)

 በኢትዮጵያ አዲስ አበባን ጨምሮ በተለያዩ አካባቢዎች ለምርመራ ትፈለጋላችሁ በሚል የሚታሰሩ ዜጎች ቁጥር እየጨመረ መምጣቱ ተገለጸ።

ለኢትዮ 360 ከየአካባቢው የደረሱት መረጃዎች እንደሚያሳዩት ለጥያቄ በሚል የሚያዙ ዜጎችን ቁጥር በውል ማወቅ አልተቻለም።

በቢሾፍቱ የጠንክር ሆቴል ባለቤት፡የጎልድ ማርክ ሆቴል ባለቤት፡የቶሚ ሆቴልና የሌሎች ሆቴል ባለቤቶች ይሄ ዜና እስከተጠናቀረበት ጊዜ ድረስ በደህንነት ሃይሎች ለጥያቄ ትፈለጋላችሁ በሚል ከተወሰዱበት አለመመለሳቸው ታዉቋል።

በሐዋሳ የኢትዮጵያ ባንዲራን፡እጃችሁ ላይ አደጋችኋል በሚል ሰበብ ወደ ምርመራ የተወሰዱ ሰዎችም ዛሬ እንዲለቋቸው ድርድር ላይ መሆናቸው ነው መረጃዎቹ የሚያመለክቱት።

የአማራ ብሔራዊ ንቅናቄ አብን ሕዝብ ግንኙነት ሃላፊ አቶ ክርስቲያን ታደለ ለአለም አቀፉ የዜና አውታር ሮይተርስ በአመራሩና በአባላቱ ላይ እየደረሰ ያለውን እንግልት እስር ይፋ ማድረጋቸውን ተከትሎ ዛሬ በቁጥጥ ስር መዋላቸው ታውቋል።

በአስራት ሚዲያ ጋዜጠኞች ላይ እየደረሰ ያለው ወከባ ተጠናክሮ መቀጠሉ ተሰምቷል።

የአማራ ክልል አሁንም በመከላከያ ቁጥጥር ስር ናት።ይህ ደግሞ ውጥረቱ  እንዲባባስና በሰበብ አስባቡ የሚታሰሩና የሚግርደሉ ሰዎች ቁጥር እንዲያሻቅብ ምክንያት ሆኗል ይላሉ የኢትዮ 360 ምንጮች።

ይህ በእንዲህ እንዳለም በፖሊስ የ28 ቀን የጊዜ ቀጠሮ የተጠየቀባቸው የባላደራው ሕዝብ ግንኙነት ሃላፊ ስንታየሁ ቸኮልና ሌሎች አባላት ከጠበቆቻቸው ጋር እንዳይገናኙ መደረጋቸውን ነው የአዲስ አበባ ባላደራ ምክር ቤት ባልደራስ ጸሃፊ አቶ ኤልያስ ገብሩ ለኢትዮ 360 የገለጸው።

የታሳሪዎቹ ቤተሰቦችም እስረኞቹን አግኝቶ ለማነጋገር በሚደረገው ጥረት ምርምራ ላይ ናቸው የሚለው ምክንያት ፈተና እንደሆነባቸው ተናግሯል።

አንድ ሰው ተጠርጥሮ በቁጥጥር ስር ሲውል የህግ አማካሪዬን ሳላናግር ቃሌን አልሰጥም የማለት መብት ቢኖረውም አባላቶቻችን ግን ይሄ መብታቸው እንዲገፈፍ ተደርጓል ነው ያለው።-ጠበቆቻቸው አግኝተው ሊያነጋግሯቸው ያደረጉት ጥረት አለመሳካቱን በመግለጽ።

የባላደራው የህዝብ ግንኙነት ሃላፊ ስንታየሁ ቸኮል ቤት ያለምንም የፍርድ ቤት ትዕዛዝ እንዲበረበር መደረጉንም ነው የተናገረው።

ይሄ አካሄድ ደግሞ ትላንት ሕወሃት ኢሕአዴግ ሲያደርግ የነበረውንና ህገ ወጥ የሆነውን የፍትህ ስርአት ያስቀጠለ ነው ይላል።

በአጠቃላይ እየታዩ ያሉት የአፈናና የማዋከብ ተግባራት የለውጥ ሃይል ነው የሚባለውን አካል ጥያቄ ውስጥ እንዲገባ አድርገውታል ሲሉ መረጃውን ከተለያዩ አካባቢዎች ለኢትዮ 360 ያደረሱት ምንጮች ገልጸዋል።