አምሀ እሸቴ - የኢትዮጵያ ሙዚቃ ባለዉለታ!!! (ታሪኩ አበበ)

–

በልጅነቱ በሥራ ምክንያት ከአዲስ አበባ አስመራ ሲመላለስ በአስመራ አሜሪካኖቹ ከፍተውት የነበረው የቃኘው ኤፍ ኤም ሬዲዮ ጣቢያ የሙዚቃ ፍቅሩን በእጥፍ እንደጨመሩለት ይናገራል፡፡

–

በአዲስ አበባም ቢሆን የክቡር ዘበኛ ንብረት የነበረው የጠቅል ሬዲዮ ጣቢያ አልፎ አልፎ የሚለቃቸውን ሙዚቃዎች መስማት የመንፈስ ሀሴትን ያጎናፅፉት ነበር፡፡

–

አምሃ እሸቴ ከአሜሪካ፣ ከህንድ፣ ከእንግሊዝ፣ ከኬንያ፣ ከሱዳን እና ከጣሊያን በ1950ዎቹ መጨረሻና በ60ዎቹ መጀመርያ የነበሩ ተወዳጅ የሙዚቃ ሸክላዎችን ወደ ሀገር ውስጥ በማስመጣት እና በመሸጥ ነበር የሙዚቃ ዓለምን የተቀላቀለው፡፡

–

የኢትዮጵያ ህዝብ የሀገር ፍቅር ማህበርና የቀዳማዊ ኃይለ ሥላሴ ትያትር ቤቶች በጊዜው ሙዚቃን የማሳተም መብት ከግርማዊነታቸው በፅህፈት ሚኒስቴር በኩል ቢሰጣቸውም ተግባራዊ ሳያደርጉት ዓመታት ተቆጠሩ፡፡

–

ይህን የተመለከተው ወጣቱ አምሃ ለምን እኔ አላሳትምም ሲል በድፍረት ተነሳ፡፡

–

በወቅቱ ከትያትር ቤቶቹ የተሰጠው ምላሽ “መብቱ የኛ ነውና እንዳትሞክረው” የሚል ዝግ መልስ ነበር፡፡

–

አምሃ ጉዳዩ አስጨነቀው፡፡ የንጉሰ ነገስቱን ህግ መጣስ ደሞ የሚያመጣውን መዘዝ ያውቃል፡፡

–

በሌላ ጎኑ እሱ የተለያዩ የውጭ ሀገራትን ሙዚቃ እያመጣ እየሸጠ የሀገሩ ሙዚቀኞች በሸክላ አለመቀረፅ፣ ለሌላውም ዓለም አለመተዋወቅ ከንክኖታል፡፡

–

ያለው አማራጭ በድፍረት አሳትሞ የሚመጣውን በፀጋ መቀበል ብቻ ሆነ፡፡ ለዚህ ደግሞ የሚተባበር ድምፃዊ ያስፈልጋል፡፡

–

አምሃ የሚያውቃቸውን ዘፋኞች አማከረ፡፡ ሁሉም ፈሩ፡፡” አዬ ጦስ ታመጣብናለህ “ እያሉ ወደኋላ አፈገፈጉ፡፡

–

በዚህ መሀል አንድ ወጣት ድምፃዊ ብቅ አለ፡፡ ድምፃዊው ከአምሃ ጋር የማይደፈረውን ለመድፈር ተስማማ፡፡

–

“ ከታሰርንም እየዘፈንን አብረን እንገባለን” ሲል የአምሃን ልብ በወኔ ሞላው፡፡ እናም ሆነ፡፡ እንደተፈራው እዚህ ግባ የሚባል ቅጣት ግን አልነበረም፡፡

–

ይህ ድምፃዊ ተወዳጁ አለማየሁ እሸቴ ሲሆን በአጋጣሚውም በአምሀ እሸቴ ሪከርድስ አማካኝነት የመጀመርያ የሸክላ ሙዚቃ አሳታሚ ለመሆን በቃ፡፡

–

ይህም ነጋድራስ ተሰማ እሸቴ በጀርመን ሀገር ካሳተሙት መዲናና ዘለሰኛ፣ ከነፈረደ ጎላ የሸክላ ስራ፣ እንዲሁም በጣሊያን ወረራ ወቅት ከታተሙ ጥቂት ሸክላዎች በኋላ በኢትዮጵያ ዘመናዊ ሙዚቃ ውስጥ ፈር ቀዳጅ ህትመት ለመሆን በቃ፡፡