>
10:09 pm - Sunday February 18, 2018

ተስፋ የሚሰጡንን መደገፍ ጥንካሬ ነው (ግዛው ለገሠ)

በጥዋቱ የፌስቡክ ዳሰሳዬ የተመለከትኩት ህወሃት ቁርጥ ያለ አቋም ይዛ መንቀሳቀስ እንደጀመረች ነው። ትናንት በሃማደ የተገለጠውን እልቄት እንደመሳሪያ ተጠቅማ፣ ህወሃት ኢህአዴግ ውስጥ ያሉ ተቀናቃኞቿን ለመምታት ወስናለች።

ሁሉም ኢትዮጵያዊ በወገኖቻችን – በኦሮምኛና በሶማሌኛ ተናጋሪ ኢትዮጵያውያን- የተደረገውን ግድያ እናውግዛለን። እልቂትን፣ የህዝብ መፈናቀልን እንደ ፖለቲካ መሳሪያ – ሃውዜንን፣ ረሃብን አመካኝቶ የትግራይን ህዝብ ወደ ሱዳን ማጓጓዝን፣ የወልቃይት አምሮች ላይ ማንነት ተኮር ማፈናቀልን ማስታወስ በቂ ነው – መጠቀም ባህሏ የሆነው ህወሃት አሁን የተፈፀመውን አሳዛኝ ልትጠቀምበት መሰረት እየጣለች ነው።

እያየን ያለነው የጉዳቱ ሰለባ የሆኑትን ማፅናናትና ማረጋጋት፣ እንዳይደገም አስፈላጊ እርምጃዎች መውሰድ ሳይሆን ለማ መገርሳና አቢይን የመምታት ፕሮፓጋንዳ ነው። በመጀመሪያ ዜጎችን የመጠበቅ ሃላፊነት የፌደራል መንግስት ድርሻ ትልቅ ነው። ጌታቸው አሰፋ የሚሰልለው ሁሉንም ኢትዮጵያዊ ነው። ስለላውን ለክልሎች ትቶ አያውቅም። የፌደራል ፖሊስ ጎንደር ሄዶ እና ንግስት ይርጋን፣ ኮሎኔል ደመቀን ይዞ አዲስ አበባ ያመጣው የክልል መዋቅሮችን ቁብ ሳይቆጥር ነው፣ የሳሞራ መከላከያ በየዩኒቨርስቲው የሚግለቱ፣ የሚደበድቡት ክልልን አክብረው አይደለም።

ኦ ለማ መገርሳ ከክልሌ ውጡ ብሏል የሚለው የትግራይ ብሄርተኞች ቀልድ ስሰማ ለኛ ያላቸው የንቀታቸው መጠን ይገርመኛል። ለማ የጦሩ አዛዥ አይደለም፣ ለማ የመከላከያ ሚኒስቴር አይደለም፣ ለማ ኤታማዦር ሹም አይደለም። በቅደመ ተከተል ሃማድ፣ ሲራጅ?ና ሳሞራ ናቸው አዛዦቹ። ከመቼ ወዲህ ነው የክልል ፕሬዘዳንት መከላከያን የሚያዘው፣ ከመቼ ወዲህ ነው መከላከያ ውስጥ እውነተኛ ስላጣን ኦሮሞ፣ አማራ፣ ሶማሌ. ሲዳማ….. ስልጣን ኖሮት የሚያውቀው? አትቀልዱ!? ሁሉም ፌደራላዊ የሃይል መሳሪያዎች ያሉት በህወሃት ቀጥተኛ እዝ ስር ነው። ትክክለኛው ጥያቄ መከላከያን እንዲወጣ ትዕዛዝ የሰጠው ማነው? ነው። መልሱ ደግሞ ስማራ ወይንም አንድ የህወሃት ጄኔራል ነው።

ስለሆነም ለወያኔ ነገሩ የህዝባችን እልቂት አይደለም፣ ጥያቄው የለውጥ ሃይሎችን መምታት ነው። ይህን ለማድረግ ደግሞ ሌላ ሃውዜን መፈጠሩ እጅግ መወገዝ አለበት። ህወሃት እነለማን ብትመታ ውድቀቷን ታፋጥናለች፣ የደም መፋሰሱን ታባብሳለች፡ እንጂ መውደቋ አይቀሬ ነው። ለውጥ መምጣቱም አይቀሬ ነው። የሚያሳዝነው ህውሃት የለውጥን ዋጋ በየቀኑ መጨመሯ፣ በሶሻል ሚድያ የሚታዩት የትግራይ ብሄርተኞችም ከህወሃት አንድ ኢንች ፈቅ ማለት አለመቻላቸው ነው።

ለለማና ለአቢይ ድጋፍ መስጠት ለውጥን ማፋጠን፣ የለውጥን ዋጋ መቀነስ ነው። የሃሳብ ልዩነቴን ከነለማ/አቢይ ለመከራከር በህወሃት እንደማይቻል አውቃለሁ፣ በነለማ መቻሉን ተስፋ አደርጋለሁ። ተስፋ የሚሰጡኝን መደገፍ ደግሞ ጥንካሬ ነው።

Filed in: Amharic